Joakop Kupers.

Verhoal.

Begreep der niks van

Mag groag taiken en as lutje jong was k ook voak ant kleuren en t noataiken van ploatjes die moi ansproaken.
Wie woonden in Stad, op houk van Frederiksplain in Boeten Oosterpoorde.

t Was zummer en zat op n woensdagmiddag veur de deure op de knaien te taiken en in te kleuren, k haar een anzichtkoarde bie pa in de loa vonnen met doarop een hoakenkruusvlaage dai deur een Oranje Laiw kepot scheurd wer, doarachter kwam dan de rood wit blauwe Nederlandse vlaage as overwinnoar te veurschien. t Was dus heul simbolies.

k Haar zo terloops al veul heuren vertellen over de oorlog, die röttege moffen en zo meer. Ik zat dus mien taikening in te kleuren, heul schier net binnen de lienen.
Puntje van de tonge stak der bie boeten de mond.

Plots ston der aine boven mie te kieken wat of ik wel dee, t was Haarm de Buur, dai woonde an de overkaande, k gaf der gain aarg op en ging gewoon wieder.
Haarm was een beetje aans, doodgoie vent, mor hai mos nait kwoad worren. Haar klap van de oorlogsjoaren overholden haar ik wel es heurd.

Verder met kleuren mor weer, mor plots greep Haarm mien taikening en scheurde hom kepot, in wel doezend stukkies, k wis nait wat of k der an haar, vloog jankendes in hoes en zögt troost bie mien moe.
Haarm laip schelndes noar hoes "voellakken bennen t, röttege moffen" en nog veul meer verwensingen.

Ben t nait over nais goan taiken en pas vatteg joar loater ben k ter achter komen woarom Haarm der tou kwam om mien taikening te verscheuren.
Zien pa was tiedens de bevrijding van Boeten Oosterpoorde op t klaine bruggetje deur de Duutsers doodschoten, hai was bie de Binnenlandse Striedkrachten en de ondergrondse Road van Verzet.

t Is toch singelier dat je noa zoveul joar der pas achter komen, en dan pas begriepen, je veur kennen stellen, dat Haarm der muite met haar, hai zag t nait aans as t was een hoakenkruus.

Ploatst: 6-05-2019